Da’a tou no amatohula zinura. Faigi ba da’a mbörö zura si sara ba börö zura si dua.

Me migu si lalö no mufatenge baomo ndraono faoma fanofu ndraono khö ndra satuara. Ba walukhasata andre no la’ohe garate wanema li nisurara moroi ba nomo.

Mamurugöi wanemali

Fatua lö labaso nisurara moroi ba nomo, andrö khö ndraono hadia zi tumbu ba dödöra me larongo wanema li ndra satuara? Tatötöna wa so samösa ma darua ba gotaluara zi no manöndra sambua refleksi moroi ba wahuhuosara khö zatuara andrö.

Iada’a be ginötö ba ndraono wombaso wanema li ndra satuara si no lasura moroi ba nomo (tenga fanemali wanofu khöra samösa! faigi tou). Faigi ena’ö inötö andre tobali inötö refleksi, tobali inötö ba ndraono wo’angeragö heza moroi ira ba heza lumalö ira ba wa’auri andre bakha ba lala wangorifi Zo’aya.

Aefa labaso ia ba andrö ena’ö lafalemba garate andrö ba mbagolö ba zi fasui gambara danö. Sökhi dania da’a tobali ndrela refleksi ndra satua göi, na möi ira ba da’ö ba labaso fefu zinöndra si no lasura iraono.

Fao khö Yosefo ba Maria ba Lala

Ba da’a tola mufalua nifotöi refleksi. Andrö khö ndraono ena’ö lafaigi yaŵa gambara danö. Andrö ena’ö la’angeragö wa fa’aröu Nazareta irugi Mbetilekhema andrö simane fa’aröu Lahewa – Telukdalam. Andrö khöra ena’ö la’angeragö hadia wa’afökhö ba fa’omuso dödö nitörö ndra satuara ba lala saröu andrö.

Aefa da’ö andrö khöra wombaso hadia nisurara tobali fanemali ba wanofu khö ndraono (fanofu nomoro tölu). Aefa labaso ia ba lafalemba ba mbagolö simane fanemali si no labaso mege.

Fefu nilau andre i’otarai migu si lalö irugi ma’ökhö no sambua halöŵö ba wefao khö Yosefo ba Maria ba lala wangorifi Zo’aya.

Na fakhamö ndraono larugi refleksi simane andre, ba no howu-howu sebua ia. No tobönö ia tobali fangerönusi Natal fondrege zi sökhi ndröfi andre!

Oguna’ö wangandrö si no lasura tobali fangali wangandrö niha samati.

Fafa wanura refleksi stasida

Odödögö ena’ö toröi gambara danö awö fefu garate wanemali ba fangandrö si no mufalemba ba zi fasui gambara danö andrö irugi ndröfi sibohou. Bagolö gereja nifalemba ngawalö halöŵö andrö tola tobali börö refleksi nösi zi sambua stasi ma’afefu.

Na möi ira ba da’ö ba la’angeragö göi lala nitörö Maria ba lala nitöröra ero zamösana ira tatötöna wa tumbu ba dödöra gera-era si sökhi, wa fahuhuo Geheha Ni’amoni’ö bakha ba dödöra, wa ifa’ele’ö khöra So’aya hadia zomasi Ia lafalua ba wa’aurira ero zamösana ira.

Ba migu Adven sitölu tola itutunö sondrönia’ö Sekami andre khö ndra fefu nösi stasi hadia zalua, ba hadia zi tobali lua-lua halöŵö si no lafalua iraono andrö. Faigi ena’ö tobali göi halöŵö andre ndrela khö ndra satua ba wefao ba lala khö Yosefo ba Maria wolo’ö somasi Zo’aya.

Umbu