Ya’ahowu ira amagu Katekis, Lektor, Guru Sekami ba ira niha samati fefu. Ba da’a tou so wanolo, ena’ö tebe’e ginötö khö nösi nomoda wamonahia Taromali ba wa’urida ero zamösana ita. Da’a tenga inötö wamaha’ö, ba hiza inötö khö Geheha Ni’amoni’ö wamatumbu’ö ba dödöda gofu hadia ia zinangea ba wolo’ö So’aya.

Molo’ö si no matörö, sökhi na mufalua da’a fatua mangandrö ba zi bongi. Ba hiza tola göi te’oguna’ö ia ba zekola migu ndraono.

Da’a tenga nibaso föna zato ba hiza ha fanolo. Börö da’ö moguna ifa’anö ia sondrönia’ö fatua lö ifalua da’a mitou. Böi irege mubaso nösi andre tou föna zato. Ha Taromali nibaso föna zato. Tanö bö’ö no fanuturu lala manö.

MANGAHASUGÖ

Andrö khö nösi nomo ma zui ya’ira si fao, ena’ö lahalö ua wa’ahono, ena’ö böi moloi-loi dödöra. Lö fakhamö muhede Geheha ba dödöda na moloi-loi dödöda.

Börötaigö faoma fangandrö sadogo-dogo ba wangandrö haga Geheha Ni’amoni’ö.

Aefa da’ö andrö khöra fefu ena’ö lahasugö ira mato sambua ma dombua menit ena’ö latöröi tödöra gofu hadia zi no latörö ba zi ma’ökhö andre bakha ba wa’omasi Zo’aya.

Awena andrö samösa moroi ba zi so ba da’ö wombaso Taromali andre tou nihalö moroi ba Injil migu fönada.

MOMBASO TAROMALI (Yoh 18:33-37)

Manofu Wilato imane, “Hadia razo niha Yahudi ndra’ugö?” Itema linia Yesu, “Hadia moroi khöu samösa wanofu andre, ma niha bö’ö zamatunö khöu sanandrösa khögu?”

Itema linia Filato, “Hadia niha Yahudi ndra’o? Banuami ba ere sebua samösa zi no manou’ö ya’ugö ba dangagu. Hadia zi no öfalua?”

Itema Yesu, “Banua amatöröŵagu tenga moroi ba gulidanö andre. Na moroi ba gulidanö ia me na, ba no molaŵa ndraono mbanuagu ena’ö böi lara’u ndra’o niha Yahudi. Amatöröŵagu tenga simane andre.”

“Eluahania, razo ndra’ugö na simanö?” ifahea linia Filato.

“Ya’ugö zanguma’ö da’ö,” itohugö Yesu, “Sindruhu sa wa razo ndra’o. Da’ö wa tumbu ndra’o. So ndra’o ba gulidanö ba wamaduhu’ö satulö. Ba fefu niha satulö mamondrondrongo ligu.”

MANGERÖNUSI

Aefa wombaso andre be’e ginötö wa’ahono ma’ifu khö nösi nomomö ena’ö mangahono Daromali andrö ba dödöra ba ena’ö tebe’e göi ginötö khö Geheha Ni’amoni’ö wamatumbu’ö ba dödöra gofu hadia ia.

Awena andrö khöra wanutunö hadia zi tokana ba dödöra moroi ba Daromali andrö? Hadia so ngawua wehede si toröi ba dödöra? Hadia kira-kira molo’ö ya’ira geluaha me iŵa’ö Yesu, so Ia ba wamaduhu’ö sindruhu?

Migu fönada andre ta’owasaini ba liturgi Yesu razo gulidanö. Hadia geluaha wa’arazo-Nia andrö molo’ö niŵa’ö Injil mege? Hana wa ha niha satulö zangila geluaha li-Nia?

MAMATÖFA

Be wanofu khö ndra ya’ira si so ba da’ö, molo’ö ya’ira hadia kira-kira gohitö dödö Lowalangi wa ifarongogö khöda Daromali andre ma’ökhö? Hadia zinangea tafalua ba migu andre ena’ö tobali Yesu razo bakha ba wa’aurida? Hadia zinangea tafalua si tola imane Yesu wa salua andrö atulö?

NITÖNGÖNI

Lala wangerönusi andre no tehalö moroi ba wednesdayword.org nifa’anö namada P. Henry Wansbrough OSB ni’oguna’ö ba fefu zekola Katolik ba ba paroki-paroki ba Konferensi Wali Gereja Inggris ba Wales. P. Henry no samösa zama’anö sura ni’amoni’ö ba li Inggris sotöi NEW JERUSALEM BIBLE faoma REVISED NEW JERUSALEM BIBLE ba te’oguna’ö ba Gereja-Gereja ba Inggris. Heŵa’ae simanö ha dane-dane zinura andre ia. No sa mufa’anö nisura ba da’e ena’ö faudu ba li khöda ba ba zi to’ölö khöda ba Danö Niha.

Taromali andre yaŵa no musura molo’ö lala wehededa ba li Niha ma’ökhö, ena’ö aoha ia khöda tobali börö wangerönusi, simane göi nifalua P. Henry ba wednesdayword.org ba li Inggris. Börö da’ö tola manö wa fabö’ö ngawua wehede ni’oguna’ö ba hiza lö sa fabö’ö geluahania. Nisura mangawuli ba li khöda moroi khö Sirus Laia, London, Inggris.