Ya’ahowu. Tou ba da’e so wanolo side-ide ena’ö tebe’e ginötö khö nösi nomoda wamonahia Taromali ba wa’urida ero zamösana ita. Inötö sadogo-dogo andre no sindruhu inötö ni’amoni’ö börö me tabe’e ginötö khö Geheha Ni’amoni’ö wamatumbu’ö ba dödöda gofu hadia ia zinangea ba wolo’ö So’aya.

Tola mufalua da’a fatua lö mangandrö ba zi bongi. Ba hiza tola göi te’oguna’ö ia ba zekola migu ndraono.

Moguna sibai tetöngöni, he ba nomo ba he ba zekola migu, ena’ö böi irege inötö andre tobali inötö wamahaö moroi khö zondrönia’ö. Da’a tenga inötö wamaha’ö niha, ba hiza inötö wangahasugö ena’ö fakhamö muhede Geheha bakha ba dödöda ero zamösana.

MANGAHASUGÖ

Andrö khö nösi nomo ma zui ya’ira si fao, ena’ö lahalö ua wa’ahono, ena’ö böi moloi-loi dödöra. Lö fakhamö muhede Geheha ba dödöda na moloi-loi dödöda.

Börötaigö faoma fangandrö sadogo-dogo ba wangandrö haga Geheha Ni’amoni’ö.

Aefa da’ö andrö khöra fefu ena’ö lahasugö ira mato sambua menit ba latöröi tödöra gofu hadia zi no latörö ba zi ma’ökhö andre bakha ba wa’omasi Zo’aya. Awena andrö samösa moroi ba zi so ba da’ö wombaso Taromali andre tou nihalö moroi ba Injil migu fönada.

MOMBASO TAROMALI (MRK 13:24-32)

Iŵaö Yesu khö ndra nifahaö-Nia, “Ba luo aefa wamakao andrö dania, ogömi haga luo ba lö muhaga mbaŵa sa’ae. Ba agatoru ndröfi moroi ba mbanua si yaŵa ba oi mondriri-ndriri abölöta mbanua si yaŵa. Ba la’ila niha dania Nono Niha andrö si tohare moroi ba lawuo si fao abölöta ba lakhömi. Ba ifatenge dania Ono Niha andrö mala’ika-Nia ba wangowuloi ira nituyu khö-Nia moroi ba zi öfa lala nangi, i’otarai mbalö danö irugi mbalö mbanua si yaŵa.

Mihalö famaedo marafala andrö: na tebörögö ombuyu ndrahania ba ateu lehe-lehenia, mi’ila wa no ahatö ginötö wa’aukhu. Simanö göi ami, na mi’ila alua fefu da’ö yaŵa, mi’ila wa no ahatö Ia, no arakhagö irugi mbawagöli mbanua. Sindruhu niŵa’ögu khömi, no alua fefu da’e fatua lö ahori zi sagötö niha andre. Atua mbanua si yaŵa ba tanö, ba hiza ligu lö awu’a. Awai i lö samösa sangila luo ba inötö andrö, he mala’ika ba zorugo ba he Ono Niha nadrö. Ha Ama zangila.”

MANGERÖNUSI

Aefa wombaso andre be’e ginötö wa’ahono ma’ifu khö nösi nomomö ena’ö mangahono Daromali andrö ba dödöra ba ena’ö tebe’e göi ginötö khö Geheha Ni’amoni’ö wamatumbu’ö ba dödöra gofu hadia ia.

Awena andrö khöra wanutunö hadia zi tokana ba dödöra moroi ba Daromali andrö? Hadia no irai la’ila zalua simane andrö si tobali tandra-tandra wa tohare Zo’aya? Hadia kira-kira molo’ö ya’ira geluaha wa lö sangila baŵa ba inötö?

MAMATÖFA

Be wanofu khö ndra ya’ira si so ba da’ö, molo’ö ya’ira hadia kira-kira gohitö dödö Lowalangi wa ifarongogö khöda Daromali andre? Hadia zinangea tafalua ba migu andre ena’ö oroma khöda dandra-tandra wa’atohare Zo’aya bakha ba wa’aurida?

Nitöngöni

Lala wangerönusi andre no tehalö moroi ba wednesdayword.org nifa’anö namada P. Henry Wansbrough OSB ni’oguna’ö ba fefu zekola Katolik ba ba paroki-paroki ba Konferensi Wali Gereja Inggris ba Wales. P. Henry no samösa zama’anö sura ni’amoni’ö ba li Inggris sotöi NEW JERUSALEM BIBLE faoma REVISED NEW JERUSALEM BIBLE ba te’oguna’ö ba Gereja-Gereja ba Inggris. Heŵa’ae simanö ha dane-dane zinura andre ia. No sa mufa’anö nisura ba da’e ena’ö faudu ba li khöda ba ba zi to’ölö khöda ba Danö Niha.

Taromali andre yaŵa no musura molo’ö lala wehededa ba li Niha ma’ökhö, ena’ö aoha ia khöda tobali börö wangerönusi, simane göi nifalua P. Henry ba wednesdayword.org ba li Inggris. Börö da’ö tola manö wa fabö’ö ngawua wehede ni’oguna’ö ba hiza lö sa fabö’ö geluahania. Nisura mangawuli ba li khöda moroi khö Sirus Laia, London, Inggris.